~

.

.

..

أقر مجلس الأمة قانون الفحص قبل الزواج ، إنّو يعني صار لازم قبل لا تتزوج تسحب خطيبتك و تسوي فحص نفس الفحص إلي لقيته في الجنطة الأثرية للأوراق في بيتنا .. لونه وردي و مكتوب من وراه مبروك بخط حلو و كبير و متفائل هذا الحجي في سنة 1980 .. سنة زواج أبوي و أميمتي ، المشكلة إنو أمي و أبوي مسوين الفحص بعد الزواج .. بوقتها أمي سألت أبوي : لو طلع الفحص مو بصالحنا ، شنو بنسوي ؟ ، قال لها : بلاهم عيال أهم شي احنا مستانسين في بعض ! - أحبه أبوي ، رومانس P: - بس الحمدلله طلع الفحص إيجابي و يابو خمسة أطفال سليمين و حلوين ، ... قبل فترة سمعت أن وحدة من زميلاتي في الكلية مخطوبة ، قبل جم يوم وحدة من البنات تصير لها تقول لي إنها فجّت الخطبة ، تقول سووا فحص الدم الوراثي و إهوا يصير لها ، فـ الظاهر إن اثنينهم حاملين لمرض معين فـ عيالهم أكيد - بإذن الله طبعًا - يكونون مصابين بالمرض < أحياء 2 \ هههههه ! صديقتي كانت تقول إن خطبة البنت استمرت سنة إلا شوي يعني تعلقت فيه و حبّته فـ لو هي مكانها كانت راح تظل معاه ، أنا بكل قناعة قلت لها مهما حبّيت شخص ممكن أضحي بهل الحب لحب أكبر : العيال و صحتهم و حياتهم ! ، الشاهد إن الناس تختلف في آراءها دايمًا حتى في البديهيات ! أنا أقول إني حبّيت القانون و إلي بدونه كنت بخليه شرط من شروط زواجي بأي شخص كان ! ولو يضيفون له فحص عن المخدرات و عن الخمر بيكملون فرحتي خاصة إن صعب يكون شرطي فحص يبيّن الخمر و المخدر في الدم =) ! بس غيري بيقول : إن تبدُ لكم تسُؤكم ! و بدل لا تكون طلعته الأولى مع خطيبته ولو كانت لمستوصف و مع حرّاس رومانتك ، بتكون سترس و ضيقة خلق P: ! .. .

.

.